Wasiirka Wasaaradda Maaliyadda ayaa maanta Golaha Baarlamaanka horgeeyay Miisaaniyadda 2025 ee Maamulka SSC-Khaatumo

Laascaanood, 18 Janaayo 2025: Wasiirka Wasaaradda Maaliyadda ee Maamulka SSC-Khaatumo, Mudane Cabdiqani Xuseen Hiirad, ayaa maanta Golaha Baarlamaanka horgeeyay Hindisaha Miisaaniyadda 2025 ee Maamulka SSC-Khaatumo.

Hindisaha Miisaaniyadda oo loo akhriyay Golaha Baarlamaanka ayaa ka kooban mideynta dhammaan miisaaniyadaha joogtada ah iyo kuwa raasumaalka ah ee Maamulka SSC-Khaatumo, iyada oo diiradda la saarayo in la xaqiijiyo hufnaanta iyo habsami-u-socodka maamulka dhaqaalaha.

Fadhiga maanta oo uu shir-guddoominayay Guddoomiye Ku-xigeenka Koowaad ee Golaha Baarlamaanka ahna Ku-simaha Guddoomiyaha, Mudane Muxyadiin Maxamed Jaamac.

Guddoomiye Ku-xigeenka Koowaad ayaa ugu dambayn sheegay in Hindisaha Miisaaniyadda 2025 lagu wareejin doono Guddiga Maaliyadda ee Golaha Baarlamaanka si ay uga gutaan waajibaadkooda oo waafaqsan Xeer-hoosaadka Golaha Baarlamaanka. Waxa uu sidoo kale u mahadceliyay Wasiirka Maaliyadda iyo xubnaha Golaha Baarlamaanka ee ka soo qayb galay fadhiga maanta.

Dhamaad
Xafiiska Xidhiidhka Dadwaynaha
Wasaaradda Maaliyadda Maamulka SSC-Khaatumo.