Kulanka qayb ka mid ah guddiyadda dhaqaalaha Waqooyiga Ameerika iyo Wasaaradda Maaliyadda

Laascaanood – Xarunta Guud ee Wasaaradda Maaliyadda

Wasaaradda Maaliyadda ee SSC-Khaatumo ayaa maanta ku qaabishay Xaruntaheeda Guud wafdi ka socday qayb ka mid ah Guddiyadda Dhaqaalaha ee Waqooyiga Ameerika. Wafdigan ayaa waxaa si diiran u soo dhaweeyay Wasiirka Maaliyadda, Mudane Cabdiqani Xuseen X. Hiirad.

Kulanka oo ahaa mid is xog-wareysi iyo isbarasho ah, ayaa waxaa lagu lafaguray arrimo dhowr ah oo la xidhiidha dhaqaalaha iyo kobcinta iskaashiga labada dhinac. Hawl-wadeennada Wasaaradda, oo uu horkacayo Agaasimaha Guud, ayaa warbixin ka siiyay wafdiga shaqooyinka muhiimka ah ee qabsoomay, iyo dadaallada socda ee lagu horumarinayo nidaamka maaliyadeed ee SSC-Khaatumo.

Sidoo kale, xubnaha Guddiga Dhaqaalaha ayaa si wayn u bogaadiyay shaqada mugga leh ee ay qabteen hawl-wadeennada Wasaaradda, iyaga oo u muujiyay mahadnaq Balaadhan, una rajeeyay guul iyo horumar dheeraad ah.

Ujeeddada booqashada ayaa ahayd mid lagu xoojinayo wada-shaqeynta iyo is-dhaafsiga khibradaha si loo dardar-geliyo horumarka dhaqaale ee gobolka.

Dhamaad
Xafiiska Xidhiidhka Dadwaynaha
Wasaaradda Maaliyadda SSC-Khaatumo